Tiven onte o pracer de participar xunto a Alexandra Touza
da presentación no Museo Sefardí de Ribadavia do seu libro: "Lola,
Amparo e Xulia. As Irmás Touza" coeditado por AGAI. Un acto moi especial pola carga emotiva
de ter lugar na vila, nas rúas e prazas onde as tres irmás Touza
levaron a cabo o seu xeneroso e valente traballo clandestino que
permitíu a centos de refuxiados xudeus salvar a vida en aqueles negros
tempos negros do reino da barbarie do Holocausto.
Ribadavia e todos os galegos temos
aínda unha débeda moral coas tres irmás Touza e o seu enorme exemplo de
entrega, sacrificio, solidariedade e humanismo en días heroicos de
chumbo en todas as Europas.
Unha lembranza tamén para o doutor vigués do Areal, Eduardo Martínez
Alonso, quen dirixía a mesma rede clandestina na que eran pezas clave as
tres irmás Touza e que desde a fronteira pirenaica axudaba a atravesar a
dura España filonazi do franquismo vencedor na Guerra Civil, a
incontables fuxitivos xudeus que soñaban con chegar a Portugal e voar
cara á liberdade e a vida.
Quen salva unha vida, salva un mundo enteiro.
Un bico Lola, Amparo e Xulia
Pedro Gómez-Valadés
Presidente de AGAI
Quen salva unha vida, salva un mundo enteiro.
Un bico Lola, Amparo e Xulia
Pedro Gómez-Valadés
Presidente de AGAI
