Por Lolín Lira Pousa
(Artigo publicado en AKI YERSHALAYIM en judeo-espanyol)
Dia de alhad, el 2.9.2007, se selebro en Ribadavia la 8ª Jornada Europea de Kultura Djudía, por inisiativa del “Centro de Estudios Medievales” ke su prezidente, Jose Luis Chao Rey, aze grandes esforsos para la evokasion de muestra intra-istoria. El me dio, kon esta okazion, un exemplar del livro de Anton Patiño Regueiro ke kon el títolo de Memoria de Ferro trata de los sangrientes epizodos de represion durante los primeros días de la Gerra Sivil.
En las ultimas pajinas de dicha ovra i en otro konteksto ya ajeno al pleto fratrisido, se revelan kon el títolo de “Lola, Amparo e Xulia, as de Ribadavia” sorprendientes aspektos de la vida de unas abitantes de la sivdad.
Las ermanas Touza konosidas komo “Las de la Kantina” porke dirijian este establesimiento en la estasion de tren de Ribadavia, eran ijas de Ines i de Guillermo, famozo propietario de “El Liseo” i muy kapache barman ke yamo la atension de la infanta Isabel, “La Chata”, en su vijita a la sivdad en 1914, por su kapachidad a la ora de kitar los tapones de bokales de shampanya.
Era en esta kantina, en una epoka en la kuala las lokomotivas a karvon obligavan a azer largas paradas afin de tomar karburante, onde se ofresian produktos kon denominasion de orijin: vino del Ribeiro, roskitas echas en kaza, likor de kafe de Juana Gayego i pechugas de indianas de Beade y Vieite. Esta aktividad se komplementava kon la vendida ambulante en el tren, durante el kurto traje entre las estasiones de Barbantes i Filgueira, onde la prezensia abitual de Amparo kon sus dulses avizava al viajador ke ya estava serka de Ribadavia.
Asta aki los datos de una biografia transparente de tres ermanas solteras en la kapitala del Ribeiro, en la dekada de los kuarenta; ma fue sin duda esta manera de vida ke las aria protagonistas de una aktividad tan klandestina komo peligroza durante la Segunda Gerra Mundial.
En la istoria de la kuala tratamos, Patiño Regueiro senyala a las tres mujeres komo miembras de una red dedikada a ayudar a los djudíos ke venian de Evropa, fuyendo de las persekusiones nazistas. Eyos yegavan de Monforte a la kantina de la estasion onde eran arekojidos i eskondidos por las Touza en sus kaza. La organizasion kontava kon el apoyo lojistiko de dos shoferes de taksi, Javier Míguez i Rocha ke en oras de la noche se enkargavan de yevarlos a la frontiera de Ponte Barxas. Tambien ayudava a esta operasion Ricardo Parada, “El Protestante”, ke despues de sesh anyos en Estados Unidos avlava kon fasilidad tanto en inglez komo en polako, i servia de interprete en estas tan peligrozas sirkonstansias.
Kuando las lokomotivas de vapor fueron remplasadas por las diesel se dio un salto kualitativo en el mundo de las komunikasiones por tren i desde entonses las largas paradas de antes fueron akurtadas de tal manera ke al viajador no le kedava tiempo para ir a la kantina. Komo konsekuensa de esto el lavoro menguo muncho asta ke en los anyos setenta Amparo i Julia serraron definitivamente el kiosko. Atras kedavan munchos anyos de lavoro i de peligroza aktividad en la kuala, movidas solamente por amor al proksimo, las tres ermanas ovraron kon la profesionalidad de un personaje de John Le Carré.
La kaza familiar en la kaye Juez Viñas, serka de la Plaza Mayor, onde fueron resividas i eskondidas sienes de personas ke fuiyan del Olokausto, esta vazia desde ke, en 1983, murio Julia, la ultima de las tres ermanas. En estos dias kuando la sivdad selebra sus fiestas mas populares kon la partisipasion de los ribadavieneses “de toda la vida”, el rekuerdo de estas ermanas se aze espesialmente bivo grasias al revelador livro de Patiño.
A falta de un rekonosimiento institusional, sea este artikolo un diskreto omenaje a estas tres mujeres devuadas - Lola, Julia i Amparo - ke sus kaza reprezentava, para los refujiados ke toparon ayi abrigo en akeyas oras eskuras de la Segunda Guerra Mundiala, la antesala de la libertad. 
La sivdad de Ribadavia, en la Komunidad Autonoma de Galicia, Espanya, es muy konsiente de la importante kontribusion de los djudios ke bivieron ayi, asta 1492, i esta aziendo un esforso muy apresiable para evokar, investigar i mijor konoser este kapitolo de su istoria. Grasias a la aktividad de su Centro de Estudos Medievais, ya pudo ser identifikado el kuartier de la sivdad onde bivieron los djudios asta sus ekspulsion, i sus sinagoga tambien ke se topava en uno de los edifisios de la Plasa de la la Magdalena, de la kuala traemos aki una fotografia.
O noso especial agradecemento a Moshe Shaul por permitirnos reproducir este texto que aparece publicado no nº 83
