Os roma (xitanos) estaban entre os
grupos elixidos por razóns raciais para ser perseguidos polo réxime
nazi e a maioría dos seus aliados.
Os nazis consideraban aos roma
"inferiores racialmente" e o destino dos roma nalgún
sentido era paralelo ao dos xudeus. Os roma estaban suxeitos a
prisión, traballos forzados, e masacre. Tamén estaban suxeitos a
deportación aos campos de exterminio. Os Einsatzgruppen (equipos
móbiles de matanza) asasinaron a decenas de miles de roma nos
territorios orientais ocupados polos alemáns. Ademais, millleiros
foron asasinados nos campos de exterminio de Auschwitz-Birkenau,
Chelmno, Belzec, Sobibor, e Treblinka. Os nazis tamén encarceraron a
miles de roma nos campos de concentración de Bergen-Belsen,
Sachsenhausen, Buchenwald, Dachau, Mauthausen, e Ravensbrueck.
O 21 de setembro de 1939, Reinhard
Heydrich, xefe da Oficina Principal de Seguridade do III Reich,
reuniuse con oficiais da Policía de Seguridade (Sipo) e do Servizo
de Seguridade (SD) en Berlín e decidiu deportar a 30.000 roma
alemáns e austriacos ao leste - territorio dentro da Polonia ocupada
polos alemáns. Este plan fracasou debido á oposición de Hans
Frank, gobernador xeral nazi da Polonia ocupada, e a decisión de
priorizar ao máximo as deportacións masivas dos xudeus de Alemaña.
Houbo con todo varias deportacións de
xitanos Ao redor de 2.500 foron deportados a Polonia en abril e maio
de 1940. A maioría morreron como resultado dos traballos forzados.
Os que enfermaban ou quedaban incapacitados foron fusilados. Outros
5.000 xitanos foron deportados a Lodz, onde foron detidos nunha área
separada dentro do ghetto xudeu de Lodz. Os que sobreviviron as
condicións horribles do ghetto foron daquela deportados ao campo de
exterminio de Chelmno, onde morreron en camións de gas.
En preparación para a súa eventual
deportación de Alemaña, todos os xitanos foron confinados en campos
(Zigeunerlager). Coa suspensión de deportacións en 1940, estes
campos convertéronse en campos de longo prazo para roma. Marzahn en
Berlín xunto con Lackenbach e Salzburg en Austria eran dos peores
destes campos. Centos de roma morreron a consecuencia das condicións.
Os alemáns da zona queixábanse constantemente dos campos, esixindo
a deportación dos roma internados aí para "protexer a
moralidade e a seguridade publica". A policía do barrio usou
estas queixas para apelar oficialmente a Heinrich Himmler, o xefe das
SS, para que reactivase as deportacións dos xitanos ao leste.
En decembro de 1942, Himmler asinou
unha orde para a deportación de todos os roma de Alemaña. Aínda
que Himmler permitiu algunhas excepcións, e os soldados xitanos do
exército alemán que se atopaban nas súas casas con licenzas
temporarias foron detidos e deportados por ser roma.
Os roma de Alemaña foron deportados a
Auschwitz, onde un campo especial foi establecido para eles en
Auschwitz-Birkenau - o "campo das familias xitanas".
Familias enteiras foron encarceradas xuntas. Os xemelgos e ananos
foron separados e suxeitos a experimentos médicos seudo-científicos
conducidos polo SS Capitán Dr. Josef Méngele. Os médicos nazis
tamén usaban prisioneiros romani nos experimentos médicos dos
campos de Ravensbrueck, Natzweiler-Struthof, e Sachsenhausen.
Nas áreas de Europa ocupadas polos
alemáns, o destino dos xitanos variaba de país a país, dependendo
das circunstancias locais. Os nazis en xeral encarceraban aos roma e
logo transportábanos a Alemaña ou Polonia para facer traballos
forzados ou para ser exterminados. Moitos roma de Polonia, Holanda,
Hungría, Italia, Iugoslavia, e Albania foron fusilados ou deportados
aos campos de exterminio e matados. Nos estados bálticos e as áreas
da Unión Soviética ocupadas polos alemáns, os Einsatzgruppen
(equipos móbiles de matanza) mataban roma ao mesmo tempo que mataban
os xudeus. Miles de homes, mulleres, e nenos romani morreron nestas
accións. Por exemplo, moitos roma foron fusilados xunto cos xudeus
en Babi Yar, preto de Kiev en Ucrania.
Os romaneses non puxeron en practica
unha política sistemática de exterminio dos roma. No entanto en
1941 entre 20.000 e 26.000 roma da área de Bucarest foron deportados
a Transnistria, na Ucraína ocupada polos romaneses, onde miles
morreron de enfermidades, inanición, e o tratamento brutal. En
Serbia, no outono de 1941, os pelotóns de execución do exército
alemán (Wehrmacht) mataron a case a poboación enteira dos homes
adultos romani xunto con todos os adultos xudeus, como represalia
pola matanza de soldados alemáns pola resistencia serbia. En
Croacia, os Ustasa (os fascistas croatas aliados con Alemaña)
mataron a 28.000 xitanos. Moitos roma foron internados e morreron no
campo de concentración de Jasenovac.
Non se sabe precisamente cantos xitanos
morreron no Porraimos (Holocausto xitano). Aínda que as estatísticas
e as porcentaxes exactas non se poden establecer, os historiadores
calculan que os alemáns e os seus aliados mataron entre 25 e 50 por
cento de todos os roma europeos. Dos aproximadamente un millón de
roma que vivían en Europa antes da guerra, aproximadamente 220.000
morreron.