“Los
judíos en el Reino de Galicia” de José Ramón Ónega
(728 paginas - Editora Nacional)
Unha obra monumental documentada sobre a presenza en Galicia, durante
séculos, do pobo hebreo, que, como noutros reinos e rexións
peninsulares, tivo aquí un contrastado e permanente protagonismo nos
sucesos históricos. O tema, practicamente inédito na investigación
galega e escaso nas referencias historiográficas españolas,
abórdase con seriedade, sentido global e como contribución
específica á Historia social de Galicia e á española, a miúdo
esquecida dos valores e achegues culturais do finisterre peninsular.
O
autor, apoiado en amplas e numerosas referencias documentais, senta a
tese da influencia hebrea en Galicia, país que recibiu sucesivas
ondas de xudeus perseguidos nos demais reinos hispánicos e que no
chan galego gozaron dunha efectiva tolerancia, tranquilidade e trato
igualitario, sendo absorbidos pola estrutura social.
Téntase
dunha análise rigorosa da achega xudía na conformación
antropolóxica e espiritual do pobo galego. A obra recolle as
noticias literarias, históricas e mítologicas sobre a Galicia
protohistórica e antiga; estuda a traxectoria hebrea no medievo
galego con especial referencia ao Camiño de Santiago, prodixiosa vía
de comercio e cultura utilizada polos xudeus; profunda na dramática
existencia dos judeo-conversos perseguidos pola Inquisición, e no
criptojudaísmo, un dos fenómenos sociais máis ignorados e
evidentes; descobre a pegada hebrea coa cita puntual dos restos
arqueolóxicos, toponímicos e etnográficos deixados polos xudeus no
país galego, e finaliza co espectro dos exterminios nazis e a súa
incidencia na política antisemita franquista.
José
Ramón Ónega
naceu en Mosteiro-Pol (Lugo), en 1939. Licenciado en Dereito pola
Universidade de Santiago, cursou o Doutoramento na Complutense.
Avogado en exercicio e Técnico da Administración Civil do Estado,
foi Profesor da Universidade Complutense. É autor de numerosas
monografías no campo do Dereito, Sociología da Inmigración e
Dereito de Asilo e Refuxio e de historia. Na esfera política ocupou
altos cargos na transición democrática, sendo Gobernador Civil de
Zamora e de Biscaia. Fué Director Xeneral de Política Interior no
Ministerio do Interior e actualmente é director da representación
da Xunta de Galicia en Madrid.
Gran
coñecedor do pasado histórico de Galicia, publicou «Os xudeus no
Reino de Galicia» (1981), de gran éxito editorial, esgotado aos
poucos meses e que foi posteriormente reeditado en varias edicións;
«Odoario
el Africano. La colonización de Galicia en el siglo VIII» (1986);
«Pasado,
presente y futuro de Pontenova» (1986);
«Perfil
histórico, artístico y paisajístico del Concello de Pol» (1988);
«Galería
de tipos históricos de las tierras de Pol» (1990); «Nicomedes
Pastor Díaz. Un romántico na Corte» (1990);
«José
María Díaz Sanjurjo. Un galego en Vietnam» (1991);
«El
enigma de José An» (1991), novela histórica; e o «Promontorio dos
caraveis mariños» (1999), narrativa, en prensa.
Colabora
habitualmente en revistas xurídicas, culturais e de contido
histórico e sociopolítico, ademais de en prensa.
