Por Raquel Lage Cuíñas
La Voz de Galicia - 03.09.09
.
O pasado martes logrou congregar a 70.000 fans israelís no Parque Hayarkon de Tel Aviv pechando a súa xira mundial Sticky and Sweet: Éxito rotundo e como sempre, polémica. A Madonna non se lle resisten nin o público que coreaba toleado ¡Esther, Esther! (nome hebreo elixido por ela) nin os xefes de estado pois como é sabido ceou coa líder da oposición Israelí, Tzipi Livni e o primeiro ministro Netanyahu recibiuna o Venres. Non faltan no País voces críticas pola súa actitude indecorosa como a do Rabino Deri, que cualificou de gran pecado a inclusión no seu disco dun tema dedicado ao Rabino Isaac De Luria, e é que as frechas do amor non sempre teñen dous vectores e aínda que ela se chame Esther, estude Cabalá, visite o Muro das Lamentacións e teña no seu séquito de gardacostas a varios maromos israelís non pode gustar a todo o mundo, está claro, nin creo que morra por iso. Si morrería en cambio no intento, se por algunhas mentes fanáticas fóra, pois como recentemente informou a revista británica "People", a milicia palestina "Comités de Resistencia Popular" afirmou o seu desexo de decapitar á diva alegando "Insúltanos co seu comportamento de puta e logo insúltanos máis co seu amor aos xudeus". O dito, ¡Bravo, Madonna! porque poucas cousas hai tan unánimes como a crítica cara a Israel e cara aos xudeus, e mentres esteas entre eles, a polémica que tanto amas non te abandonará e en Israel, aínda que non gustes a todos, miles seguirante aplaudindo e ninguén, xamais, te cortará a cabeza. ¿Imaxínas a Madonna en Palestina?
