UNHA
DELEGACIÓN EMPRESARIAL GALEGA IMPULSADA POLA CONSELLERÍA DE ECONOMÍA E INDUSTRIA ABRE
NOVAS POSIBILIDADES PARA AS NOSAS EMPRESAS EN ISRAEL
A Consellería de Economía e Industria impulsou a delegación
empresarial que visitou esta pasada semana Israel co obxectivo de abrir
novas posibilidades de colaboración institucional e comercial das
empresas galegas co mercado deste país, que destaca polo seu
potencial innovador.
A través do Instituto Galego de
Promoción Económica (Igape), a Consellería que dirixe Xavier
Guerra, facilitou a participación das empresas galegas nas feiras
internacionais que reuniron en Israel ás principais compañías e
institucións principalmente no eido da tecnoloxía, a innovación,
as TIC, as enerxías renovables ou biotecnoloxía, ademais dos
negocios en ámbitos de actividade como a construción e a
agricultura.
O director xeral do Igape, Xavier
Aguilera, que encabezou a delegación galega que participou durante
esta semana Maio de Galicia en Israel, mantivo encontros
institucionais coa directora do Israel Export & International
Cooperation Institute, Sabine Segal, e co director de Investment
Promotion Center do Ministerio de Industria israelí, Oded Distel.
Tamén se mantiveron reunións coa directora de relacións
internacionais da Federación Israelí de Cámaras de Comercio,
Ronnie Reiber, e co responsable para relacións con España do
Program Manager, Europe do Matimop, a axencia do Goberno de Israel
que se ocupa de promover as relacións entre as empresas do país e
as estranxeiras.
O apoio da Xunta para incrementar as
relacións institucionais e comerciais fíxose efectivo a través da
iniciativa Maio de Galicia en Israel, organizada polo Igape. Entre as empresas galegas que participaron nalgunha das
mostras internacionais programadas figuran Galchimia, Telecon
Galicia, Teaxul, Cultivos Casaíta ou UtilVigo.
O Igape achegou ás empresas
interesadas en participar nalgunha destas mostras internacionais
asistencia técnica previa, asistencia permanente en destino, durante
todo o mes de maio, apoio para a participación nas feiras do seu
interese, elaboración de axendas de reunións e contactos, e visitas
guiadas. Ao mesmo tempo, a Consellería de Economía e Industria
participou en diferentes roldas de negocios con empresas
potencialmente interesadas en investir en Galicia.
Esta iniciativa constituíu unha
oportunidade de interese estratéxico para avanzar nas relacións
empresariais entre Galicia e Israel, dada a diversidade das mostras
internacionais desenvolvidas durante este mes de maio: Building,
mostra internacional de construción e infraestruturas; Agritech
2012, sobre tecnoloxía agrícola; ILSI BioMed, de ciencia e
tecnoloxía, e New Tech Enhibition, sobre alta tecnoloxía e
electrónica.
A misión da delegación galega serviu
para abrir novas vías de colaboración, tanto con institucións como
con entidades privadas relacionadas coa promoción da actividade
empresarial, vías chamadas a facilitar o estreitamento de relacións
comerciais entre empresas galegas e israelís.
