31/07/08

Os nosos parabéns!


Vimos de recibir a fantástica nova da concesión á profesora galega Mª Gloria de Antonio do premio Samuel Toledano 2008 polo seu libro "Los judios en Galicia (1044-1492)"

Lembrar que este prestixioso premio é concedido anualmente e presentado en Xerusalén, levando o nome de Samuel (Sam) Toledano z”l, quen foi un dos renovadores da comunidade xudía en España.

O premio é concedido a un investigador de Israel e a outro de España, que traballan sobre temas aos que se dedicou Samuel Toledano:

a.-Estudo das comunidades xudías en España e nos países da diáspora sefardí: a súa historia e o seu legado cultural.

b.-As relacións entre xudeus, cristians e musulmans en España.

c.-As relacións entre España e Israel.

O premio está dotado de 15.000 $ para cada un dos dos galardoados.

A comisión do Premio está presidida polo Sr. D. Yitzhak Navón, quinto Presidente do Estado de Israel e a compoñen destacados membros do campo académico e personalidades do ámbito público (político, cultural, etc.) israelí así coma representantes da familia Toledano.

O xurado está composto por tres membros, que se elixen anualmente pola comision do Premio. Acéptanse orixinais en idioma hebreo, español ou inglés.

Desde a Asociación Galega de Amizade con Israel (AGAI) felicitamos á profesora Mª Gloria de Antonio polo merecidísimo recoñecemento.

Como curiosidade diremos que en Novembro do pasado ano entregamos persoalmente na Knesset e no Yad Vashem senllos exemplares do libro para que en Israel, Galicia tamén esté presente.

Mazel Tov!!
Noraboa!!